在黃湛森成長的年代，粵語流行曲在電台音樂廣播節目中，只是眾聲之一，在一個百分之八十居民說粵語的地方，這是出奇的事。

粵語流行曲脫胎自粵樂，在華南社會，有承先啟後的優勢。但在整個五十年代，這些優勢沒能實現。黃湛森在前線體會是：粵語流行曲的革命，尚未成功。

那些年，粵語流行曲由選曲、填詞 、到演唱、伴奏、發行、推廣等，都不如對手。美國流行音樂品質高超，實力雄厚，是本土音樂人仰望的典範。國語時代曲二十年代在上海初生，經過多年發育，早上軌道。1952年後，百代唱片公司在港招攬了國語時代曲的原班人馬，由銅鑼灣設備齊全(但據說隔音欠佳)的錄音室開始，起步重生，成績立見。與此相比，粵語流行曲起步較遲，規模較小，製作較參差，產品有毛病，結果是間有陣風，但不成巨浪。

黃湛森的體會，不是人人認同。他們說，粵語流行曲有底子，有蠻力，可溫文，又鬼馬，最好的作品，依著傳統，向西洋肆意取材，孕育港式青春，影響遍及星馬。

粵語流行曲的身世，十分複雜，是一本待寫的書。

猴子戲 (節錄) (1957)

撰曲：朱頂鶴
主唱：朱頂鶴、馮玉玲
　　　
朱唱：穿州過縣　縣又過川
　　　橋在我身邊不帶錢
馮唱：帶了一箱小馬騮
　　　終身養留破時年
朱白：等我開個檔先
馮白：開檔啦
朱唱：我向左右　拱拱手
　　　諸君看我舞馬騮
馮唱：佢騎着隻綿羊當馬走
朱唱：又會耍刀槍打筋斗
馮白：佢真係幾趣怪架
朱白：又碌冬瓜嘞
馮白：猴子戲開台
　　　先演呆佬拜壽
朱白：一隻大花旦
　　　一隻大小丑
朱唱：表演拜壽　做妙手
　　　樣樣夠逼真撚滋悠
馮唱：着過件寬呔打晒周
　　　走出了大街過門樓
馮白：嗱入屋嘞
朱唱：佢到屋內　拱拱手
　　　周身怪旦仲笑開
馮唱：佢行近到台前去偷壽酒
朱唱：又會恭喜猛磕頭
馮白：咪講咁多嘞　收錢先啦
朱白：人人俾錢啦
馮白：每位收一毫
　　　收完仲有嘢睇架
朱白：一隻扮靚女
　　　一隻扮壽仔
馮白：點解佢搶咗個鑼錘
　　　硬係唔肯做呢？
朱白：呀係嘞　
　　　你哋人人唔俾錢
　　　隻馬騮搶咗個鑼錘唔肯做嘞
　　　你哋俾錢啦　
　　　係囉　你又俾　細路哥又俾　
　　　呢個伯父都俾　
　　　係囉　大姑又俾　
　　　嗱　收咗錢　打筋斗嘞
　　　又試撈魚嘞　
　　　係囉　咁多嘢睇呀
朱唱：風騷俏麗　又扮女仔
　　　遇着個靚仔追到上嚟
馮唱：碰跌一跤似一隻龜
　　　靚女嗰件衫染了黄泥
馮白：喂　真係笑死我哈哈
朱唱：靚仔要跪　靚女發威
　　　冤冤氣氣就拍拖返歸
馮白：好嘞
馮唱：時候已完場要多謝各位
合唱：大眾請歸家要睇再復嚟