八音樂師弦索手

吳瑞卿旁白：
以前聽歌的場所，叫「八音館」，音樂師叫做弦索手，行內俗稱「誒誒佬」。 當年鴉片公賣，八音館樂師原來大多都吸食鴉片。 

杜煥講話：
嗰陣時我哋喺越南街嗰間「八音錦」，嗰間八音館，晚晚收工都成乍（下去聲）喺處打牙鉸呀嘛，由嗰度識呀。盲公唔係個喺度嘅，不過我就識嗰啲人，嗰啲八音佬，即係玩樂器嗰班人。裡邊八音館嗰班人我冚把冷 （下去聲） 識咁解。 點解我哋會識呢？你知道啦，舊時嗰啲誒（下平聲）誒（上平聲）佬個個都係道友嚟嘅。所以點解我做盲人，人哋做盲人，喺油麻地度，點解我識咁多人呢？佢哋嗰啲人又咁少呢？因為我哋識得人多就係咁嘅理由呀！ （榮：就係嗰味嘢！） 係！係嗰 ….. 舊時好豐盛嘛，真係隨街隨巷都係嘅！