旁白：
榮鴻曾是一位香港長大，留學美國，畢業於哈佛大學的民族音樂學者。他聽過杜煥唱南音，認為很有藝術價值，希望重構瞽師賣唱的環境，讓杜煥演唱錄音。

曲詞：
（說）吓！因為前者哩，我與哩位榮先生經已初次曾經哩，喺大會堂相見哩，約談過此事，後至到呢間教堂亦見到面噃。吓！咁呀，亦係談過哩咁嘅事，話我叫你唱，咁呀，佢問我要幾多時間哩，我話喺嘞，家陣時呀，唉！唱唔唱得幾耐咋，我家陣哩吓，一個鐘頭都要唞兩回，大概一氣唱哩，順過普通都係五個字到喇，六個字唱唔到喇。氣魄趕唔上，縱使間唱都係監硬頂，咁，有時嘅精神夠哩，氣魄夠哩，或者會唱到半個鐘頭，都可以係頂得掂，唱得掂。如果日或時哩，係咩哩？都係四個字到穩陣啲。無他，咁你可以一個鐘頭分兩次唱呀咁，咁所以我應承咗，電話應承咗。咁呀嗰日係幾時哩？嗰日呀都係，都係在三月時期踝㗎嘞，不過幾呀時起哩，我就好似忘記了喇，唔知三，二月，我都唔記得咗喇，好似咁上下嘞！二月三月咁喇，約數好似係六，七，好似七號五號呢段時期㗎嘞。咁呀因為點解哩？我略記嗰個時期，因為我回憶應承咗呢個崇基嗰段生意哩，所以我將啲時間因過嘅。係嘞，咁呀能夠可以趕得到，亦可以做得到，咁樣，我就略略記得係嗰個時期。