曲詞：
可謂招待嘅周周好人事，佢闔家老幼人仲禮謙，一切謙厚，謙厚摯誠不枉佢財主呀，記得我哋少年時。（說）吓！哩位何耀光先生哩，闔家大細，人事確好，好謙，不枉有錢人嘅家裡呀。點解哩，我記得我哋少年，曾在廣州跟埋師傅去上台。你估去邊處哩？吓！回憶起上來就好笑夾好笑，去嗰處叫做田心，佢田心係姓，叫做田心楊。咁呀，請我師傅去唱，我做徒弟，舊時初入門，跟佢尾喇！去到哩，你估食嘢呀，佢哋就好呀，不過我哋兩師徒食哩苛待囉。茶杯哩，用嗰啲叫做葵花杯，正所謂即係等於佢啲下人所用嘅。佢哋埋邊嗰啲哩，嗰陣時我在少年時，隻眼好見吓，對面人我望到，係話！咁你估幾苛待呀，所俾親茶杯飲茶，係俾嗰啲妹仔呀，嗰啲洗婆呀所用嘅茶杯。食嘢哩，筷子碗亦係另自嘅，分開彼此嘅，另自我哋兩師徒坐響處嗰張凳都無嘅，都係另自嘅，俾啲橋凳呀，俾嗰啲妹仔係廚房食飯嗰啲橋凳呀，俾我哋兩師徒坐嘅。咁比起呢個何耀光先生嘅家人哩，真係蚊髀牛髀囉！（唱）真係回憶記得係在當年，故此世人品格確新鮮。回想雙方人去比，天淵之別確不虛言。