旁白：
又例如1973年秋天，有人請他和老拍檔瞽師何臣到中環李寶椿大廈唱曲。杜煥先唱 《霸王別姬》，何臣吹笛子伴奏，之後再唱《男燒衣》。客人用私家車接送，兩人各賺了兩百元，歡天喜地。 1975年農曆十月十五是下元節，有人請他到沙田獻藝，唱了兩首喜慶歌，賺了二百五十元。

曲詞：
哦！原來呢一個係我拍，舊日嗰個拍檔係夥記，就係何臣尋搵，我問他言。原來叫我某日某時一齊去呀，去邊處呀？佢話你們共我去嗰處係李寶椿，佢話我亦不知誰人所叫呀，佢都唔知道，無非兩個前去係為嘅賺錢 ……（說）吓！我話何臣，究竟邊一個叫呢？佢話佢都唔知喎。哈，我想我哋搵食真係浮到不了呀，邊個都唔知嘅，佢話唔知呀。呢個叫做亞九介紹嘅，咁呀又有個唔知乜嘢姑娘咁 。咁呀佢話叫我哋呀去李寶椿大廈十一樓，你最緊要唔好應承第二處。咁呀，幾錢呀？佢話每人二百。咁幾耐呢？佢話唱兩支嘢啫。咁呀當堂就應承嘞。呀！好彩數唔使問人有人帶路，乜嘢哩？何臣嘅老婆吖嘛，佢有個八婆帶路，咁就一個錢唔使破費，竟然有車來接，一齊共載。（唱） 齊歡喜呀，共佢一齊去再共一時。