板眼《兩老契嗌交》（又名《爛大鼓》）選段1：杜煥演唱

板眼是從前瞽師在妓院花艇娛樂妓女與嫖客的曲藝。板眼只在妓院中演唱，並無外傳，是最特殊的曲種，亦最早隨妓院的消失而失傳。 板眼的故事都是有關妓女、客人和下九流人物，文字俏皮，充滿俚語俗話、雙關語和歇後語，曲調活潑，節奏明快，瞽師自拉大板胡伴奏，經常一句裡半唱帶說，難度極高。 由於環境特殊，詞曲都不受傳統禮敎束縛，自由發揮，更時有涉及世俗所不容的淫詞褻語。

曲詞：
哎喲！ 我踱來踱去，踱下踱來， 都係唔得嚿蒜 （算）！ 點解呀？係嘍，實見囉攣。 想我爛大鼓，生來，係冇 乜嘅人緣。唔係冇人緣！ 不過百家憎。 想我哩， 想我爛大鼓為人，係自己作賤，哎喲， 有觀音係唔學， 學個何二趴面。 想我有錢哩，嗰陣時呀， 也住到沙面呀。 哩，我叫艇喎， 遊河，樣樣都佔先。 哩！哩！哩！ 今晚又叫青蘭，明晚叫瑞鑽。有晚瑞彩喎，阿瑞珍，與共阿瑞嬋呀。我叫老舉哩，係叫來，風車咁轉。 嗰啲老舉話我，話我貪同人客試新鮮。所以話埋行，老舉埋行，佢就抵制我喇。 喺喇！有錢冇地擤呀！有嘅，有個瑞彩，生平共我格外有緣。 佢話人客送盡 一萬九千九百九十個都未曾遂得佢心願，話我爛大鼓哩，就生來嗰啲脾性， 撳扁搓圓。 所以話喎，話跟我係埋街，跟唔到哩，就會尋短見喎。話要生要死，要話擝刀割大髀喎，歸家寧願同我食粥捱鹽。