電台演唱博取生意

吳瑞卿旁白：
50年代末，杜煥到香港電台演南音節目，收入如何？

杜煥講話：
（榮：你去一次幾多錢？）嗰陣時？一次35蚊咋頭頭！有乜用唧？一個禮拜得一次。 （榮：嗰時35蚊好多吓囉！）係啫，我知道！我就想唔做嘞，就俾我朋友鬧住，就係招呼我上到嗰個。「咁你最低限度有卅幾蚊一個禮拜呀，你嗰餐茶，嗰餐煙，頂得住吓呀！又何必呢？唏，咁你又博人哋嗰啲叫嘅啫！」 咁7月10日去，收尾率之做到八月尾，即係做咗四次啦。到8月尾，鍾恩龍就話：「睇吓嘞，好似話俾多個節目你嘅。好似係第二個月係嘅。」實係係嘅嘞，不過佢話定好似係，呢啲鍾恩龍嗰啲幽默嘢。 好嘞，九月就俾兩個節目嘞，有70蚊一個禮拜啦。到第二年，就俾夠三個節目嘞，即係1957年，57就俾。冇錯，一個禮拜兩次做咗好耐呀，57年哩就俾多次嘞，俾三次呀。咁就幾好啦！一個禮拜三次嘞。 58年哩，升多10蚊，咁就45，好有心機做囉！